ការរៀនសូត្រនៅតែជារឿងសំខាន់មិនថាសង្គមដើរដល់សម័យកាលណាក៏ដោយ ជាពិសេសសម័យកាលបច្ចុប្បន្នមនុស្សស្រីចាំបាច់ណាស់មានចំណេះ មានគំនិត។ ខាងក្រោមនេះជាហេតុផលដែលមនុស្សស្រីរស់ក្នុងសម័យកាលថ្មីនេះហេតុផលដែលមនុស្សស្រីគួររៀនសូត្រ និងមានចំណេះដឹងជីវិតមុនរៀបការ។
១. កាន់តែបង្កើនតម្លៃសម្រាប់ខ្លួនឯង
ពេលអ្នកមានចំណេះខ្ពស់ ដឹងខុសត្រូវ វាក៏បានបង្កើនតម្លៃ មិនឲ្យគេមើលងាយ និងជាន់ឈ្លី អ្នកបានងាយៗ ព្រោះអ្នកជាមនុស្សស្រីដែលមានការអប់រំ និងទទួលបានចំណេះដឹងល្អដែលមិនមែនមោគៗឲ្យគេបន្ទាបតម្លៃបាននោះទេ។
២. ការពារខ្លួន ការពារក្រុមគ្រួសារ
នៅពេលអ្នកមានចំណេះដឹង អ្នកមិនងាយឲ្យគេបោកប្រាស់បាន ឬអនុញ្ញាតឲ្យនរណាម្នាក់មកធ្វើបាបក្រុមគ្រួសារអ្នកឡើយ ព្រោះមនុស្សស្រីដែលមានចំណេះដឹងទាបងាយនឹងចាញ់បោក និងជឿទុកចិត្តគេណាស់បើធៀបជាមួយមនុស្សស្រីរៀនបានច្រើន និងឆ្លងកាត់មេរៀនជីវិតបានច្រើន។
៣. បន្តក្តីស្រមៃខ្លួន
អ្នកមានសមត្ថភាពក្នុងការចូលរួមការងារសង្គមដោយគ្មានភាពរើសអើង បើសិនជាអ្នកចង់បន្តការងារ ឬក្តីស្រមៃអ្នក។ មនុស្សស្រីសម័យថ្មីពូកែណាស់ មិនត្រឹមតែអាចថែរក្សាផ្ទះ កូនៗបាននោះទេ នាងក៏នៅតែអាចបន្តការងារ ឬចេញទៅក្រៅប្រឡូកលើអាជីពដែលនាងស្រឡាញ់។
៤. អប់រំកូនៗបានល្អ
នៅពេលអ្នកជាមនុស្សស្រីដែលបានទទួលការអប់រំល្អ អ្នកក៏មានសមត្ថភាពក្នុងការអប់រំកូន និងដឹកនាំកូនៗឲ្យក្លាយជាមនុស្សល្អក្នុងសង្គមបានល្អដែរ។ យ៉ាងហោចណាស់អ្នកដឹងពីតម្លៃនៃការអប់រំ និងពីវិធីអប់រំកូនៗឲ្យដើរផ្លូវល្អបាន។
៥. រក្សាសុវត្ថិភាពខ្លួន និងសុខភាពផ្លូវភេទ
កាលដែលមានចំណេះដឹងគ្រប់គ្រាន់ អ្នកក៏អាចថែរក្សាសុវត្ថិភាពខ្លួន និងសុខភាពផ្លូវភេទដើម្បីខ្លួនឯង ព្រោះនៅពេលអ្នកមិនបានយល់ដឹងអ្វីសោះអ្នកអាចនឹងមានហានិភ័យក្នុងការជួបបញ្ហាផ្លូវចិត្ត ឬផ្លូវភេទ បើសិនជាដៃគូរបស់អ្នកមិនបានយល់ដឹង ឬមិនយល់ពីអ្នក។
៦. បង្កើតគ្រួសារដ៏ពេញលេញល្អមួយ
អ្នកអាចមានសមត្ថភាពរកចំណូលគ្រប់គ្រាន់ និងភាពចាស់ទុំក្នុងការគ្រប់គ្រងគ្រួសារ។ អាចកាត់បន្ថយភាពក្រីក្រ ដោយអ្នកអាចស្វែងរកជំនាញពិតប្រាកដមួយដែលអាចជួយខ្លួនអ្នក និងគ្រួសារឲ្យចាកចេញពីជីវភាពទីទ័លក្រ។ សុភមង្គលមិនពឹងលើលុយ តែមានលុយទើបមានសុភមង្គល បែបនៈហើយទើបមនុស្សស្រីមិនគួររស់ពឹងតែប្តីនោះ។
ជាមនុស្សស្រីគួរតែរៀនសូត្រឲ្យបានខ្ពស់តាមតែអាចធ្វើបាន ហើយមិនគួរមានគំនិតចោលការសិក្សាហើយចាំតែនៅផ្ទះឲ្យប្ដីចិញ្ចឹមនោះទេ៕