តារាសម្ដែង Jet Li ហៅក្រៅ លីលានជា ដែលជាតារាសម្តែងដែលមានកេរ្តិ៍ឈ្មោះល្បីនៅក្នុងវិស័យភាពយន្ត បាននិយាយថា លោកធ្លាប់សម្រាកពីការងារ ដើម្បីនៅជាមួយកូនស្រីពៅរបស់គាត់ ដោយសារតែនាងធ្លាក់ទឹកចិត្តតាំងពីវ័យក្មេង។ បន្ទាប់ពីបានរៀបការជាមួយអតីតតារាសម្តែង Nina Li Chi តាំងពីឆ្នាំ 1999 ហើយពួកគេមានកូនស្រីពីរនាក់គឺ Jane អាយុ 23 ឆ្នាំ និង Jada អាយុ 20 ឆ្នាំ។
លើសពីនេះ លោក លី លានជា បាននិយាយថា Jada បានទទួលរងពីជំងឺធ្លាក់ទឹកចិត្តនៅពេលនាងមានអាយុ 7 ឆ្នាំ ប៉ុន្តែមិនដឹងថាមកពីហេតុផលអ្វីពិតប្រាកដឡើយ ហើយគាត់មានអារម្មណ៍អស់សង្ឃឹមបន្ទាប់ពីស្ថានភាពរបស់នាងកាន់តែអាក្រក់នៅពេលដែលនាងឈានដល់អាយុ 13 ឆ្នាំ។
អ្វីដែលសំខាន់នោះ តារាសម្តែងប្រុសរូបនេះ មានអារម្មណ៍ថាសោកស្តាយ ហើយគាត់តែងតែចង់និយាយសុំទោសទៅកាន់កូនស្រីរបស់ខ្លួន ដែលគាត់មិនបានបំពេញតួនាទីជាឪពុកឲ្យបានពេញលេញដើម្បីមើលថែកូនស្រីរបស់ខ្លួន។
លើសពីនេះ លោកបន្ថែមទៀតថា ខ្ញុំលះបង់ពេលវេលាទាំងអស់របស់ខ្ញុំសម្រាប់មនុស្សជុំវិញពិភពលោក ហើយភ្លេចយកចិត្តទុកដាក់ចំពោះគ្រួសារ ហើយខ្ញុំមិនដឹងថាត្រូវធ្វើដូចម្តេចដើម្បីក្លាយជាឪពុកដ៏ល្អម្នាក់ឡើយ ដូច្នេះតើខ្ញុំអាចរៀនធ្វើជាឪពុកម្តងទៀតបានទេ បើវាមិនទាន់យឺត?
មិនតែប៉ុណ្ណោះ លោកបន្តទៀតថា កេរ្តិ៍ឈ្មោះ និងសំណាងគឺគ្មានប្រយោជន៍អ្វីទៀតឡើយ ខណៈដែលកូនស្រីពៅរបស់លោកក្លាយជាបែបនេះ។ ដូចនេះហើយទើបលោកព្យាយាមកែប្រែខ្លួនឲ្យក្លាយជាឪពុកល្អសម្រាប់កូនស្រី ដើម្បីកុំឲ្យមានវិប្បដិសេរីនៅថ្ងៃក្រោយ។
