ថ្មីៗនេះ បន្ទាប់ពីមានការផ្លាស់ប្តូរច្បាប់មិនកំណត់អាយុប្រឡងបវរកញ្ញា ស្ត្រី Marissa Teijo អាយុ ៧១ ក្លាយជាបេក្ខនារីចំណាស់ជាងគេក្នុងការប្រកួត ដែលមានសិទ្ធិចូលរួមក្នុងការប្រលង Miss Texas USA 2024 ក្នុងប្រវត្តិសាស្រ្តដំបូងគេ។
លើសពីនេះ ដោយសារតែគេហទំព័របវរកញ្ញារដ្ឋ Texas សហរដ្ឋអាមេរិក បានប្រកាសថា ចាប់តាំងពីឆ្នាំ 2023 ស្ត្រីដែលមិនទាន់រៀបការ ឬបានរៀបការ ក៏ដូចជាស្ត្រីមានផ្ទៃពោះ ឬមានកូន” ក៏អាចចូលរួមប្រឡងបានផងដែរ។
ដូច្នេះហើយ ធ្វើឲ្យ Marissa Teijo អាចបំពេញក្តីស្រមៃរបស់នាងក្នុងការចូលរួមប្រកួតប្រជែងបវរកញ្ញារដ្ឋ Texas នៅអាយុ ៧១ ឆ្នាំ បន្ទាប់ពីមានការកែប្រែច្បាប់ថ្មីបែបនេះ។
យ៉ាងណាមិញ កាលពីថ្ងៃអាទិត្យទី ២២ កន្លងទៅនេះ Teijo និងស្ត្រី 74 នាក់ផ្សេងទៀតបានចូលរួមក្នុងការប្រលងនៅ Houston ប៉ុន្តែទោះជា Teijo បានទាក់ទាញចំណាប់អារម្មណ៍ពេញការប្រកួត និង បានបង្កើតប្រវត្តិសាស្ត្រជាបេក្ខនារីដែលភាពលេចធ្លោក្នុងវ័យចំណាស់ដែលមិនធ្លាប់មាន ក៏ដោយ ប៉ុន្តែនៅទីបំផុត Aarienna Ware បានឈ្នះម្ចាស់ជ័យលាភីទៅវិញ។
ថ្វីត្បិតតែមិនបានទទួលជ័យជម្នះមែន ក៏ប៉ុន្តែ Teijo នៅតែបង្ហាញពីភាពស្រស់ស្អាត និងភាពរឹងមាំពីខាងក្នុងរបស់ស្រ្តីដោយមិនខ្លាចនិងពាក្យរិះគន់របស់នរណាម្នាក់ឡើយ ហើយថែមទាំងលើកទឹកចិត្តដល់មនុស្សគ្រប់គ្នាឲ្យមានទឹកចិត្តក្លាហានហ៊ានដើរតាមក្តីស្រមៃរបស់ខ្លួនបន្ថែមទៀត។
ប្រភព ៖ Today.com
