Jung Joon Young ដែលត្រូវបានដោះលែង កាលពីពេលថ្មីៗនេះ បន្ទាប់ពីជាប់ពន្ធនាគារ ពីបទឧក្រិដ្ឋផ្លូវភេទ ត្រូវបានគេប្រទះឃើញ នៅទីក្រុង Lyon ប្រទេសបារាំង។ ដែលកាលពីថ្ងៃទី 8 ខែកក្កដា អ្នកនិយមលេងអ៊ីនធើណែតម្នាក់ បានចែករំលែករូបថតនៅលើអ៊ីនធើណែត ដែលបង្ហាញពីរូបរាងបច្ចុប្បន្នរបស់ Jung Joon Young។
នៅក្នុងរូបថត Jung Joon Young ត្រូវបានគេឃើញមានសក់វែង និងពុកចង្ការ ថែមទាំងកំពុងញញឹមយ៉ាងស្រស់ទៀតផង។ អ្នកនិយមលេងអ៊ីនធើណែត ដែលបានបង្ហោះរូបថតនោះបានរៀបរាប់ថា “គាត់នៅបារមួយកន្លែងព្យាយាមចែចង់នារីៗ សុំគណនី Instagram របស់ពួកគេ ហើយនិយាយថាគាត់មានគម្រោងបើកភោជនីយដ្ឋានកូរ៉េ នៅទីក្រុងលីយ៉ុង ប្រទេសបារំាងនេះ មិនតែប៉ុណ្ណោះ Jung Joon Young ថែមទាំងបាន ណែនាំដោយ អះអាងថាជាតារាចម្រៀងល្បីមកពីកូរ៉េ” ។
បន្ទាប់ពីរបាយការណ៍ដំបូងនេះ វីដេអូបានលេចចេញបង្ហាញពី Jung Joon Young មានភាពស្និទ្ធស្នាល ជាមួយនារីៗនៅក្នុងក្លឹប។ ទន្ទឹមនឹងនេះដែរ Jung Joon Young ធ្លាប់បានព្យាយាមបើកភោជនីយដ្ឋាន នៅទីក្រុងប៉ារីសក្នុងឆ្នាំ 2018 ប៉ុន្តែផែនការបញ្ចប់វិញ ចំពេលមានរឿងអាស្រូវ Burning Sun ។ បន្ទាប់ពីការដោះលែងពីពន្ធនាគារ មានរបាយការណ៍ និងពាក្យចចាមអារ៉ាមថា Jung Joon Young គ្រោងនឹងធ្វើចំណាកស្រុក ទៅកាន់ប្រទេសមួយផ្សេងទៀត។
ភ្លាមៗអ្នកលេងអ៊ីនធើណែតកូរ៉េ មានការងឿងឆ្ងល់បន្ទាប់ពីបានឃើញកន្លែងលាក់ខ្លួន របស់ Jung Joon Young និងសកម្មភាពបច្ចុប្បន្ននៅប្រទេសបារាំង។ មហាជនជាច្រើនបានចង្អុលបង្ហាញថា មនុស្សមិនអាចផ្លាស់ប្តូរទម្លាប់ចាស់បានទេ។ ពួកគេបានបញ្ចេញមតិ៖
«ខ្ញុំគិតថាការកាត់ទោសគាត់ គឺស្រាលពេកសម្រាប់អ្វីដែលគាត់បានធ្វើ»
«ខ្ញុំមិនភ្ញាក់ផ្អើលទេ ព្រោះនេះជាឆ្កែជើងចាស់ ជាមួយនឹងល្បិចថ្មី»
«ហេតុអ្វីបានជា គាត់មិនទទួលបានខ្សែតាមដាននៅកជើង?»
ប្រភព៖ Allkpop
