ពិតណាស់ មានអ្នកគាំទ្រនៅតែចងចាំពីកម្មវិធី The Return Of Superman ដែលបានបង្ហាញពីកុមារដ៏គួរឲ្យស្រឡាញ់ទាំងបីគឺ Daehan, Minguk និង Manse ជាកូនប្រុសរបស់តារាសម្ដែង Song Il Kook។
អ្នកគាំទ្រជាច្រើនបានមើលកម្មវិធីនេះ ចាប់តាំងពីវាចាក់ផ្សាយក្នុងឆ្នាំ 2013 ហើយបានមើលក្មេងៗបីនាក់ធំឡើងជាមួយគ្នា។ សូម្បីតែកាលពីប៉ុន្មានខែមុននេះ វីដេអូនៃក្មេងៗបីនាក់បានរីករាលដាល នៅលើអ៊ីនធើណែត ដោយទទួលបានការចូលមើលជាងមួយលានដង ក្នុងរយៈពេលតិចជាង 24 ម៉ោង។
តែថ្មីៗនេះ កុមារទាំងបីបានផ្ទុះការចាប់អារម្មណ៍ឡើងម្ដងទៀត ដោយបង្ហាញពីការធំលូតលាស់របស់ពួកគេ ខណៈដែលពួកគេបានបង្ហាញខ្លួននៅលើ Instagram ផ្លូវការរបស់ tvN “You Quiz On The Block”។
ថ្វីត្បិតតែមើលទៅពួកគេដូចយុវជនពេញវ័យក្នុងឈុត និងក្រវ៉ាត់កក៏ដោយ ប៉ុន្តែបច្ចុប្បន្នពួកគេកំពុងរៀនថ្នាក់ទី 6 ប៉ុណ្ណោះ។ យ៉ាងណាមិញ អ្នកលេងអ៊ីនធើណែតគ្រប់ៗគ្នា បានបង្ហាញការភ្ញាក់ផ្អើលរបស់ពួកគេចំពោះការធំលូតលាស់ដ៏លឿនរបស់កុមារៗទាំងបី និងមានអ្នកខ្លះពិតជាមិនអាចរងចាំទស្សនាកម្មវិធី “You Quiz On The Block” នេះ។
ប្រភព៖ Koreaboo
