ដូចដែលប្រិយមិត្តបានដឹងរួចមកហើយថា កម្មវិធី Misters of Cambodia គឺជាកម្មវិធីប្រកួតបុរសឯកកម្ពុជា ដើម្បីស្វែងរកបេក្ខជន ដែលមានសមត្ថភាពដើម្បីតំណាងបុរសឯកកម្ពុជា ទៅប្រកួតលើឆាកអន្តរជាតិ។
ក្នុងនោះ កម្មវិធីមួយនេះ ត្រូវបានបង្តើតឡើងដោយលោក ម៉ែន និមលរតន៍ នាយកប្រតិបត្តិ CIM លោកធ្លាប់បានបញ្ជាក់ថា វាគឺជាវេទិកាមួយសម្រាប់យុវជនក្នុងការកសាងទំនុកចិត្តលើខ្លួនឯង និងបញ្ឆេះការផ្លាស់ប្តូរជាវិជ្ជមាននៅក្នុងខ្លួនគាត់ និងសហគមន៍ទូទាំងពិភពលោក។
ទន្ទឹមនឹងនេះ កម្មវិធី បុរសឯកកម្ពុជា Mister of Cambodia 2024 ដែលទើបតែកន្លងផុតទៅនេះ ក៏ទទួលបានជោគជ័យមិនស្ទើដូចគ្នា ដែលមានបេក្ខភាព 3 រូបតំណាងឲ្យបុរសឯកកម្ពុជា ទៅប្រកួតនៅប្រទេសវៀតណាម និង ប្រទេសថៃ ថែមទៀត។
អ្វីដែលកាន់តែពិសេសនោះគឺ ឥលូវនេះ កម្មវិធីបុរសឯកកម្ពុជា Mister of Cambodia 2025 បានចាប់ផ្តើមបើកជ្រើសរើសបេក្ខភាពហើយ ដូច្នេះលោកអ្នកក៏អាចដាក់ពាក្យបានដែរ។ ខាងក្រោមនេះគឺជាលក្ខខណ្ឌមួយចំនួនក្នុងការជ្រើសរើស ៖
លក្ខខណ្ឌជ្រើសរើស
– ត្រូវមានអាយុចាប់ពី ១៨ឆ្នាំ ដល់ ៣៥ឆ្នាំ
– យ៉ាងហោចណាស់មានកម្ពស់ ១៧៣ សង់ទីម៉ែត្រ
– នៅលីវ, មិនធ្លាប់រៀបការ, មិនធ្លាប់មានបុត្រ
– អ្នកត្រូវកាន់លិខិតឆ្លងដែនកម្ពុជា ឬមានសញ្ជាតិពីរ
– ចរិតលក្ខណៈល្អ, មានទំនាក់ទំនងល្អ
– មានចំណេះដឹងទាក់ទងអំពីវប្បធម៌ ទេសចរណ៍ និងប្រពៃណីរបស់កម្ពុជា
– មានភាពរឹងមាំខាងសង្គម និង/ឬបង្ហាញពីសមត្ថភាពជាអ្នកដឹកនាំ និងលើកទឹកចិត្តអ្នកដទៃ។ អាចប្រមូលផ្តុំមនុស្សរួមគ្នា លើកទឹកចិត្តពួកគេ និងដឹកនាំដោយគំរូ។
– បេក្ខភាពគួរតែជាមនុស្សចេះសម្របខ្លួនចូលចំណោមគ្រប់មជ្ឈដ្ឋាននៃជីវិត និងជម្រុញការផ្លាស់ប្តូរជាវិជ្ជមាននៅក្នុងសហគមន៍។
