«ភាពជាម្ដាយមិនមែនជាឧបសគ្គ តែជាកិត្តិយស។ ក្លាយជាម្ដាយមិនមែនជាការបញ្ចប់ក្តីសុបិន្ត តែជាការចាប់ផ្ដើមថ្មី» របស់ បវរកញ្ញាចក្រវាលឆ្នាំ ២០២៤ ប្រាសាទ ដាវីន បានក្លាយជាឃ្លាដ៏មានឥទ្ធិពល និងជម្រុញផ្លូវចិត្តបំផុតដល់ស្រ្តីទូទាំងសាកលលោក មិនមែនតែស្រ្តីនៅកម្ពុជានោះទេ។
ប្រាសាទ ដាវីន មានអាយុ៣៣ ឆ្នាំ បានគ្រងម្កុដបវរកញ្ញាចក្រវាលឆ្នាំ២០២៤ ថ្មីរបស់កម្ពុជាក្នុងឆ្នាំនេះ។ នាងនឹងតំណាងប្រទេសរបស់នាងក្នុងការប្រកួតបវរកញ្ញាចក្រវាលឆ្នាំ ២០២៤ នៅទីក្រុង Mexico City។ ការប្រកួតវគ្គផ្តាច់ព្រ័ត្រនៃការប្រកួតសម្រស់ដ៏មានកិត្យានុភាពបំផុតរបស់ពិភពលោកនឹងធ្វើឡើងនៅថ្ងៃទី ១៦ ខែវិច្ឆិកា នៅ CDMX ក្នុងទីក្រុង Mexico City។
ជ័យជម្នះ របស់ ប្រាសាទ ដាវីនបានក្លាយជាប្រវត្តិសាស្ត្រខណៈនាងជាស្ត្រីខ្មែរដំបូងគេដែលបានរៀបការហើយដែលបានគ្រងមកុដដ៏មានកិត្យានុភាពមួយនេះ។ នាងជាតារាម៉ូដែល តារាបង្ហាញម៉ូដ និងជាម្តាយដែលមានកូនស្រីអាយុ៥ឆ្នាំ ។ មកទល់ពេលនេះ នាងជាស្ត្រីអាស៊ីតែម្នាក់គត់ដែលបានរៀបការក្នុងបញ្ជីបវរកញ្ញាចក្រវាលឆ្នាំ២០២៤។ ក្នុងសុន្ទរកថាចុងក្រោយរបស់នាង នាងបានសម្តែងនូវក្តីសង្ឃឹមរបស់នាងដើម្បីក្លាយជា «និមិត្តរូបនៃសក្ដានុពលគ្មានព្រំដែនដែលមាននៅក្នុងស្ត្រីគ្រប់រូប»។
កាលពី ពីរឆ្នាំមុន អង្គការបវរកញ្ញាចក្រវាលបានប្រកាសពីការផ្លាស់ប្តូរច្បាប់មួយចំនួនដោយបានអនុញ្ញាតឱ្យស្ត្រីរៀបការ និងម្តាយចូលរួមប្រកួតប្រជែង ហើយក៏បានបើកទ្វារឱ្យអុ្នកដែលផ្លាស់ប្តូរភេទ និងលុបចោលការកំណត់អាយុទាំងអស់ទៀតផង។ ជាមួយគ្នានេះ លោកស្រី ម៉ែន សំអន ទីប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា មានវត្តមានចូលរួមអបអរសាទរ ដាវីន ប្រាសាទ ចំពោះសមិទ្ធិផលដ៏មិនគួរឲ្យជឿ ក្នុងការក្លាយជាម្តាយទី ១ ដែលគ្រងម្កុដបវរកញ្ញាចក្រវាលកម្ពុជា។
គួររំលឹកផងដែរកាលពីឆ្នាំមុន ប្រាសាទ ដាវីន ក៏បានឈ្នះជុំទី៤ នៃ Universal Woman 2023 នៅទីក្រុងឌូបៃ ប្រទេសអារ៉ាប់រួម (UAE) ផងដែរ។
លើសពីនេះ កាលពីឆ្នាំ ២០២២ ដាវីន ក៏ធ្លាប់ជាទូតសុឆន្ទះការបំបៅកូនដោយទឹកដោះដើម្បីលើកកម្ពស់សុខភាពកុមារកម្ពុជាទៀតផង។
