ដូចដែលគ្រប់គ្នាបានជ្រាបរួចមកហើយថា ព្រឹទ្ធាចារ្យចាប៉ីដងវែង លោកតា គង់ ណៃ ដែលបានទទួលអនិច្ចកម្មដោយ រោគាពាធ ក្នុងជន្មាយុ 80ឆ្នាំ កាលពីម្សិលមិញនេះ ខណៈដែល វណ្ណដា កំពុងតែសម្តែងនៅអាមេរិក ដូច្នេះថ្ងៃនេះ ឆ្លៀតពីការងារលោកក៏បានបង្ហោះសារ ដែលជាសំណេរសរសេរដៃដូចខាងក្រោម៖
![](https://vachanamedia.com/wp-content/uploads/2024/06/449385165_1021164112696068_2031974236671199784_n-1024x683.jpg)
“នៅពេលដែលលឺដំណឹងមួយនេះ ពិតជាពិបាកទទួលយក ពិបាកនឹងទប់ទឹកភ្នែក ស្របពេលដែលខ្ញុំកំពុងពង្រីកពីភាពអស្ចារ្យនៃសិល្បៈខ្មែរ តន្រ្តីខ្មែរ និងបាននាំឧបករណ៍តន្រ្តីបុរាណខ្មែរ ដូចជា ខ្លុយ ទ្រ ចាប៉ី ឃឹម មកតំណាងឲ្យប្រទេសកម្ពុជា ទទួលយកការស្រឡាញ់គាំទ្រ ការគោរពជាទៅមោទនៈ ស្រាប់តែទទួលបានដំណឹងដ៏ស្លុតចិត្តពីដែនដីកំណើត ដោយក្រុមការងារបានប្រាប់ថា លោកគ្រូ គង់ ណៃ បានទទួលមរណភាព ដោយជរាពាធ។
![](https://vachanamedia.com/wp-content/uploads/2024/06/449392230_1021164066029406_1455095278490728740_n-1024x682.jpg)
ដំណឹងមួយនេះពិតជាប៉ះទង្គិចផ្លូវចិត្តរបស់ខ្ញុំជាខ្លាំង ព្រោះលោកគ្រូ-លោកតា ព្រឹទ្ធាចារ្យ គង់ ណៃ គឺជាចំណែកដ័ធំមួយ នៃភាពជោគជ័យរបស់ខ្ញុំនៅបច្ចុប្បន្ននេះ។ ពាក្យទូន្មានប្រៀបប្រដៅរបស់លោកគ្រូនៅតែដក់ជាប់ក្នុងចិត្តរបស់ខ្ញុំជារៀងរហូត បើទោះបីជាខ្ញុំផ្ទាល់មិនទាន់ត្រឡប់ទៅមាតិភូមិវិញ ទៅជួបលោកតាឲ្យទាន់ដង្ហើមចុងក្រោយ តែខ្ញុំដឹងថា លោកតាកំពុងតែជូនពរពួកយើង ឲ្យកំលាំងចិត្តពួកយើងបន្ថែមទៀត សម្រាប់ថែរក្សា និងការពារសំលេងនៃឧបករណ៍បុរាណខ្មែរ។ ការដែលបាត់បង់លោកតា គឺជាការបាត់បង់ធនធានដ៏អស្ចារ្យ ដែលលោកតាដើរតួយ៉ាងសំខាន់ ក្នុងការបង្រៀនយើងឲ្យតស៊ូក្នុងជីវិតមួយនេះ។
![](https://vachanamedia.com/wp-content/uploads/2024/06/449485987_1021163916029421_7914267487020148145_n-776x1024.jpg)
ជាចុងក្រោយ ខ្ញុំសូមផ្ញើក្តីស្រឡាញ់ ក្តីនឹករលឹក ជូនទៅកាន់ លោកយាយ អរគុណដែលបានមើលថែរក្សាការពារលោកតា មានក្តីស្រឡាញ់ឥតលក្ខខណ្ឌ ចំពោះលោកតា ចៅសូមចូលរួមរំលែកទុក្ខដ៏ក្រៀមក្រំមួយនេះ ជួនចំពោះលោកយាយ និងក្រុមគ្រួសារ សូមជូនពរ លោកយាយឲ្យមានសុខភាពល្អ អាយុយឺនយូរជារៀងរហូតតទៅ។ – ពីចៅ វណ្ណដា”
![](https://vachanamedia.com/wp-content/uploads/2024/06/449480740_1021163996029413_6992085156053951650_n-601x1024.jpg)
បន្ថែមពីនេះ វណ្ណដា ក៏បានបង្ហោះរូបភាពរបស់លោក ព្រមជាមួយនឹងព្រឹទ្ធាចារ្យលោកតា គង់ ណៃ កាលពីលោកនៅមានជីវិតផងដែរ។
![](https://vachanamedia.com/wp-content/uploads/2024/06/449457560_1021164102696069_3367351697056927559_n-717x1024.jpg)
![](https://vachanamedia.com/wp-content/uploads/2024/06/449368415_1021164072696072_3212720188291278006_n-768x1024.jpg)
![](https://vachanamedia.com/wp-content/uploads/2024/06/449457216_1021164036029409_6699307174285139277_n-768x1024.jpg)
![](https://vachanamedia.com/wp-content/uploads/2024/06/449419483_1021164022696077_1568608591667541185_n-768x1024.jpg)
ប្រភព៖ គណនី វណ្ណដា