អាហារពេលព្រឹក គឺជាអាហារដ៏សំខាន់បំផុតនៃរាងកាយរបស់អ្នក ជាពិសេស ជួយឲ្យរាងការរបស់អ្នកកាន់តែមានថាមពល និង មិនញ៉ាំច្រើននៅពេលក្រោយ។ លើសពីនេះ ការរំលងអាហារពេលព្រឹកមិនមែនជាមធ្យោបាយល្អនោះទេ ព្រោះវាអាចមានផលប៉ះពាល់ជាច្រើនសម្រាប់សុខភាពរបស់អ្នក។ បើសិនជាអ្នកឧស្សាហ៍រំលងអាហារពេលព្រឹក អាចមានបញ្ហាដូចខាងក្រោម ៖
១. គ្មានកម្លាំងកំហែង
អាហារពេលព្រឹកជាប្រភពថាមពល ប្រសិនបើអ្នកមានការរំលងអាហារពេលព្រឹក ធ្វើឲ្យរាងកាយរបស់អ្នកបាត់បង់ថាមពលច្រើន ដូចនេះហើយ ទើបធ្វើឲ្យរាងកាយរបស់អ្នកល្ហិតល្ហៃ គ្មានកម្លាំងកំហែង និង មិនសូវរហ័សរហួនឡើយ។
២. ឈឺក្រពះ
ការរំលងអាហារពេលព្រឹក ធ្វើឲ្យក្រពះរបស់អ្នកដំណើរការមិនបានល្អឡើយ។ ការដែលអ្នកមិនញ៉ាំអាហារពេលព្រឹក ក្រពះរបស់អ្នកមិនបានកិនអាហារតាមទម្លាប់ នោះជាហេតុធ្វើឲ្យអ្នកឧស្សាហ៍ឈឺក្រពះជាញឹកញយ។
៣. អារម្មណ៍មិននឹងនរ
នៅពេលអ្នកមិនបានទទួលទានអាហារពេលព្រឹកនោះទេ ក្រពះរបស់អ្នកនឹងចាប់ផ្តើមកូរ ហើយខួរក្បាលរបស់អ្នកមិនអាចផ្តោតអារម្មណ៍ទៅលើអ្វីមួយយ៉ាងល្អបានទេ។ លើសពីនេះ នៅពេលដែលអ្នកឃ្លាន អ្នកអាចមានអារម្មណ៍ឆេវឆាវខុសពីធម្មតា។.
តាមពិតទៅ ការញ៉ាំអាហារពេលព្រឹក អាចជួយរក្សាលំនឹងកម្រិតជាតិស្ករក្នុងឈាម និងការពារការថយចុះថាមពល និងការឃ្លានខុសពេល។ សំខាន់ជាងនេះទៅទៀត បើអ្នកញ៉ាំអាហារពេលពេលដែលមានសុខភាពល្អ អារម្មណ៍របស់អ្នកក៏ល្អតាមហ្នឹងដែរ ព្រមទាំងជួយកាត់បន្ថយឱកាសនៃការញ៉ាំច្រើនពេកនៅពេលថ្ងៃ ឬពេលល្ងាច ដើម្បីមិនឲ្យអ្នកងាយឡើងទម្ងន់។
