កំឡុងពេលមានផ្ទៃពោះគឺសំខាន់ណាស់ ហើយកាន់តែសំខាន់គឺការយល់ដឹងពីជំងឺផ្សេងដែលអ្នកមានកំឡុងពេលនេះ។ ខាងក្រោមនេះជាការពន្យល់របស់ វេជ្ជបណ្ឌិត អ៊ាម សេរីរដ្ឋ ឯកទេស ជំងឺទឹកនោមផ្អែម និងជំងឺក្រពេញអរម៉ូន ទៅលើជំងឺទឹកនោមផ្អែមដែលស្រ្តីមានផ្ទៃពោះត្រូវយល់ដឹង។
១.តើអ្វីជាជំងឺទឹកនោមផ្អែមកំឡុងពេលមានផ្ទៃពោះ?
ជាការកើនឡើងនៃកំរិតជាតិស្ករដែលរកឃើញជាលើកដំបូងនៅពេលមានផ្ទៃពោះ( ២- ១០% នៃស្រ្តីមានផ្ទៃពោះត្រូវបានរកឃើញថាមានជំងឺនេះ)។
២. តើកត្តាអ្វីខ្លះនាំស្ត្រីអោយមានជំងឺនេះ?
អរម៉ូន៖ ការថយចុះនៃការផលិត ការថយចុះសកម្មភាពអរម៉ូនអាំងស៊ុយលីនរបស់លំពែង (insulin-resistance) ដែលមានតួនាទីបញ្ចុះជាតិស្ករក្នុងចរន្តឈាម និង ការកើនឡើងនៃអរម៉ូនផ្ទៃពោះ (ពិសេសចាប់ពីត្រីមាសទី២) នាំទៅដល់
-អតុល្យភាពនៃការគ្រប់គ្រងកំរិតជាតិស្ករ កំឡុងពេលពពោះរបស់ម្តាយ។
-អតុល្យភាពនៃលំនឹងរបបអាហារ។
-កត្តាប្រឈមផ្សេងទៀត៖
• តំណពូជ៖ ស្ត្រីដែលមានឳពុក ម្តាយមានជំងឺទឹកនោមផ្អែម។
• សុខភាពផ្ទាល់ខ្លួន៖ស្ត្រីមានបញ្ហាត្រៀមទឹកនោមផ្អែមស្រាប់ (pre-diabetes) មានគភ៍នៅអាយុ ៣៥ឆ្នាំ ទំងន់លើសកំរិត (BMI >/= 25 kg/m2) ។
• ប្រវត្តិផ្ទៃពោះមុនៗ៖ ធ្លាប់មានជំងឺទឹកនោមផ្អែម បម្រុងក្រឡាភ្លើង សម្រាលកូនធំ(> ៤ គីឡូ)។
៣. តើធ្វើដូចម្តេច ទើបអាចរកឃើញថាមានជម្ងឺនេះ?
ការពិនិត្យកំរិតជាតិស្ករក្នុងឈាមមុនពេលហូបអាហារ ពេលនៅកំឡុងត្រីមាសទីមួយ។
និង ធ្វើតេស្តពិសារជាតិស្ករ ៧៥ក្រាម ( OGTT ) ម្តងទៀតនៅចន្លោះសប្តាហ៍ទី ២៤-២៨ ករណីរកឃើញថាមានកត្តា១ ក្នុងចំណោមកត្តាទាំងអស់ខាងលើ (ទោះបីតេស្តលើកទី១ធម្មតាក៏ដោយ)។
៤. តើអ្វីជាការគ្រប់គ្រង និង តាមដានបន្តដែលត្រឹមត្រូវ ?
ផ្តើមពីការផ្លាស់ប្តូររបបចំណីអាហារ របៀបរបបក្នុងការរស់នៅ ជាមួយលំហាត់ប្រាណសមស្រប ។
ករណីមិនជោគជ័យ ឈានដល់ការប្រើប្រាស់អាំងស៊ុយលីន។
ការតាមដាន៖
• កំឡុងពេលមានផ្ទៃពោះ ៖ ជាមួយវេជ្ជបណ្ឌិតឯកទេសសម្ភពសម្រាប់សុខភាពផ្ទៃពោះ និង វេជ្ជបណ្ឌិតឯកទេសផ្នែកក្រពេញអរម៉ូន សម្រាប់ការគ្រប់គ្រងលំនឹងជាតិស្ករ។
• ក្រោយសម្រាល(ចន្លោះ សប្តាហ៍ទី ៦ ដល់ ៨)៖ តេស្តពិសារជាតិស្ករ ៧៥ក្រាម ( OGTT ) និង វិភាគឈាមចាំបាច់ផ្សេងទៀត ដើម្បីបញ្ជាក់ពីការត្រឡប់មកសភាពធម្មតារបស់ស្ត្រី។
៥.តើការគ្រប់គ្រងមិនត្រឹមត្រូវផ្តល់ផលវិបាកអ្វីខ្លះដល់មាតា និង ទារក?
ម្តាយ៖ ផលវិបាកមុន និង ក្រោយសម្រាលនៃជម្ងឺទឹកនោមផ្អែមផ្ទាល់ ប្រឈមនឹងជំងឺលើសសម្ពាធឈាម/បម្រុងក្រលាភ្លើង ការឆ្លងរោគ និង រលាកប្រព័ន្ធបង្ហួរនោមរុំារ៉ៃ ។
ទារក:ប្រឈមនឹងការសំរាលមុនកំណត់ ឬ បញ្ឈប់ការលូតលាស់ក្នុងផ្ទៃ សម្រាលលើសទំងន់ ប្រឈមនឹងការចុះជាតិស្ករក្រោយសម្រាលភ្លាមៗ ឬផលវិបាកប្រពន្ធ័មេតាបូលិករបស់ទារក។ល។
ការថែរក្សាសុខភាព និងបង្កាខ្លួនពីជំងឺផ្សេងៗគឺសំខាន់ណាស់សម្រាប់ស្ត្រីមានផ្ទៃពោះ ដូច្នេះអ្នកគួរតែយល់ដឹង និងទៅពិគ្រោះជាមួយដុកទ័រឯកទេសឲ្យបានជាប់លាប់។
