ជីវិតអ្នករៀននៅសកលវិទ្យាល័យ អាចមិនងាយស្រួលដូចការគិតនោះទេ ប្រហែលរៀនផងធ្វើការផងដោយគ្មានពេលសម្រាក និង ពេលខ្លះមកពីការគេងមិនគ្រប់។ ម្យ៉ាងទៀត ការគេងមិនគ្រប់ គឺមានផលប៉ះពាល់ជាខ្លាំងចំពោះសិស្សនិស្សិត ដូចនេះ គន្លឹះប្រាំខាងក្រោមនេះ សម្រាប់ជួយសិស្សមហាវិទ្យាល័យក្នុងការគេងឲ្យបានល្អ ៖
១. រៀបចំបន្ទប់គេងរបស់អ្នកឲ្យមានផាសុខភាព
បន្ទប់គេរញ៉េរញ៉ៃអាចធ្វើឲ្យអ្នកគេងមិនស្រួល ថែមទាំងមានផលប៉ះពាល់ដល់សុខភាពរបស់អ្នកដោយសារតែធូលីដី និង មេរោគ ដូចនេះប្រសិនបើអ្នកចង់ឲ្យការគេងរបស់អ្នកប្រកបដោយសេចក្តីសុខ កុំព្រងើយកន្តើយចំពោះការរៀបចំបន្ទប់របស់អ្នក។
២. ជៀសវាងញ៉ាំគ្រឿងស្រវឹងមុនពេលចូលគេង
ទោះបីជាអាកុលធ្វើឲ្យអ្នកឆាប់គេង ប៉ុន្តែវាមិនល្អសម្រាប់សុខភាពរបស់អ្នកឡើយ ព្រោះជាតិស្រវឹងធ្វើឱ្យគុណភាពដំណេកធ្លាក់ចុះក្នុងពេលយប់ ដែលអាចបង្កឱ្យមានផលប៉ះពាល់រយៈពេលខ្លី។ ដើម្បីជៀសវាងផលប៉ះពាល់អវិជ្ជមានទាំងនេះទៅលើការគេង និងសុខភាពរបស់អ្នក យកល្អកុំពិសារគ្រឿងស្រវឹងនៅជិតម៉ោងចូលគេង។
៣. ធ្វើលំហាត់ប្រាណពេលល្ងាច ឬ សមាធិមុនចូលគេង
ការធ្វើលំហាត់ប្រាណពេលល្ងាចមានអត្ថប្រយោជន៍ណាស់សម្រាប់រាងកាយ និង ដំណេករបស់អ្នក ព្រោះវាធ្វើឲ្យរាងកាយរបស់អ្នកបញ្ចេញជាតិពុលចេញពីរាងកាយ និង ជួយឲ្យអ្នកគេងលក់ស្រួលផងដែរ។ បន្ថែមពីនេះប្រសិនបើអ្នកគ្មានពេលហាត់ប្រាណនោះទេ អ្នកអាចធ្វើសមាធិមុនពេលចូលគេងមួយម៉ោងបាន ដោយវាជួយកាត់បន្ថយការគិតច្រើនរបស់អ្នក និង ធ្វើឲ្យអារម្មណ៍របស់ស្ងប់ល្អជាដើម។
៤. បន្ធូរអារម្មណ៍ កុំបង្ខំខ្លួនឯងឲ្យគេង
ប្រសិនបើអ្នកមានអារម្មណ៍ខ្លួនឯងគេងមិនលក់នោះ កុំចូលចិត្តផឹកថ្នាំងងុយគេងអី ព្រោះការផឹកថ្នាំងងុយគេងអាចធ្វើឲ្យអ្នកអស់កម្លាំង និង មិនស្រស់ស្រាយនៅពេលព្រឹកឡើយ។ ជាជម្រើសល្អ អ្នកគួរតែឆុងតែញ៉ាំដើម្បីបន្ធូរអារម្មណ៍របស់អ្នកមុនចូលគេងទើបជាការប្រសើរ។
៥. អានសៀវភៅមុនចូលគេង
ការអាន គឺជាឧបករណ៍កាត់បន្ថយភាពតានតឹងដ៏អស្ចារ្យ មិនត្រឹមតែជួយសម្រាលការគិតច្រើន តានតឹងនិងស្មុគស្មាញនោះទេ ព្រមទាំងបង្វែរអារម្មណ៍អ្នកពីបញ្ហាក្នុងជីវិតពិតថែមទៀតផង។ លើសពីនេះ ការអានសៀវភៅអាចជាថ្នាំងងុយគេងមួយដែលអាចធ្វើឲ្យអ្នកចាប់គេងលក់ ដែលអ្នកអាចសាកល្បងបាន។
ជឿថាអ្នកជាសិស្សនិស្សិត និង ជាអ្នកធ្វើការ ប្រាកដជាចង់តែមានពេលសម្រាក និង ការគេងមួយដ៏ល្អ ដូចនេះ អ្នកអាចឆ្លៀតពេលខ្លះៗដើម្បីឲ្យខ្លួនឯង គេងលក់ស្រួលនិង មិនមានផលប៉ះពាល់ដល់សុខភាពក្នុងការគេងមិនបានគ្រប់គ្រាន់។
