អាកាសធាតុក្តៅខ្លាំង ស្បែករបស់អ្នកនឹងងាយប្រតិកម្ម ស្រអាប់មិនស្អាត ហើយភាគច្រើនតែងតែប្រឈមនឹងហានិភ័យនៃការឡើងក្រហម កន្ទួល និងរមាស់រាល់ពេលស្ថិតក្រោមពន្លឺព្រះអាទិត្យ និងបែកញើសច្រើន។ ដូច្នេះ ការថែរក្សាស្បែកតាមគ្រឿងផ្សំធម្មជាតិ គឺវិធី ការពារការខូចខាតនៃស្បែកដែលបណ្តាលមកពីពន្លឺព្រះអាទិត្យ។ ខាងក្រោមនេះជាគ្រឿងផ្សំ ៥ មុខ ជួយថែក្សាស្បែករបស់អ្នក ក្នុងកំឡុងអាកាសធាតុក្តៅ
![](https://vachanamedia.com/wp-content/uploads/2024/04/364f7471dfca679cdaf7f4c3af55671b.jpg)
១. ផ្លែល្ហុង
នៅក្នុងផ្លែល្ហុង មានសារធាតុជួយផលិតកូឡាជែន និង ធ្វើអោយស្បែកទន់រលោង ជួយកាត់បន្ថយជាតិពណ៌ស្បែក និងស្នាមជាំ។ លើសពីនេះ ប្រសិនបើអ្នកមានបញ្ហាស្បែកខ្មៅស្រអាប់ក្នុងរដូវក្តៅ លាបផ្លែល្ហុងនៅលើមុខរបស់អ្នក ឬអាចបុកជាដុំតូចៗ ហើយលាបជាម៉ាសលើមុខទុក១៥នាទី រួចលាងសម្អាតជាការស្រេច។
![](https://vachanamedia.com/wp-content/uploads/2024/04/d5b1921025a83ab45864af89c405f9c5.jpg)
២. ដំឡូងបារាំង
ដំឡូងបារាំង គឺជាគ្រឿងផ្សំធម្មជាតិដ៏ល្អបំផុត មានប្រសិទិ្ធភាពក្នុងការបំបាត់ស្នាមជាំ ស្នាមអុចខ្មៅ កម្ចាត់ជាតិកខ្វក់ និងប្រេងចេញពីផ្ទៃមុខរបស់អ្នក និងធ្វើឱ្យស្បែកមុខភ្លឺថ្លាផងដែរ។ បន្ថែមពីនេះ អ្នកអាចលាបវានៅលើស្បែកដោយគ្រាន់តែ កិនដំឡូងបារាំងឲ្យម៉ត់ ទឹកក្រូចឆ្មារមួយស្លាបព្រាបាយ រួមជាមួយទឹកឃ្មុំមួយស្លាបព្រាបាយ ទុករយៈពេល១០ទៅ១៥នាទី រួចលាងសម្អាតមុខគឺរួចរាល់។
![](https://vachanamedia.com/wp-content/uploads/2024/04/Screen-Shot-2024-04-04-at-3.50.43-PM-1024x460.png)
៣. ចេក
ចេកផ្ទុកទៅដោយវីតាមីន A, B និង E ក៏ដូចជាប៉ូតាស្យូម និង ជួយផ្តល់សំណើមបែបធម្មជាតិដល់ស្បែកមុខរបស់អ្នក។ លើសពីនេះ អ្នកអាចយកចេកធ្វើជា face-pack ដោយ កិនជាដុំៗ ហើយលាយជាមួយទឹកឃ្មុំ ទឹកដោះគោ ឬប្រេងអូលីវ។ លាងមុខរបស់អ្នកដោយទឹកក្តៅឧណ្ហៗ មុននឹងលាបគ្រឿងផ្សំទាំងនេះត្រូវចាំថា ពេលលាងសម្អាតក៏ត្រូវប្រើទឹកក្តៅឧណ្ហៗផងដែរ។
![](https://vachanamedia.com/wp-content/uploads/2024/04/87b0837855f8c72d2fdcb0f9fbf02b94.jpg)
៤. ប្រទាលកន្ទុយក្រពើ
ប្រទាលកន្ទុយក្រពើ សម្បូរដោយសារធាតុចិញ្ចឹមដូចជាវីតាមីន A, B1, C, biotins និងប៉ូតាស្យូម មានជាតិទឹកប្រហែល 96% ជួយផ្តល់សំណើមដល់ស្បែក ព្រមទាំងជួយរក្សាពណ៌ស្បែកឱ្យស្មើគ្នា និងយកសារធាតុមិនស្អាតចេញពីស្បែកមុខរបស់អ្នកថែមទៀតផង។ វិធីប្រើគ្រឿងផ្សំនេះ គឺគ្រាន់តែ យកប្រទាលកន្ទុយក្រពើមកកិន រួចប្រើកន្ត្រងមានប្រឡោះតូចៗដើម្បីបំបែកសាច់ចេញពីទឹករបស់វា។ ក្រោយពីចាក់ចូលក្នុងដប់រួចអ្ន កអាចយកទៅដាក់ក្នុងទូរទឹកកក។ មុនពេលចូលគេង ប្រើវានៅលើមុខរបស់អ្នកជាទឹកជូតសម្អាតក៏បាន ឬ អ្នកអាចលាបទឹកនេះលើស្បែក ក្នុងអំឡុងពេលថ្ងៃក្តៅក៏បានដែរ។
![](https://vachanamedia.com/wp-content/uploads/2024/04/f3a3ca11898d3e605bc9f6319e6f137c.jpg)
៥. ឪឡឹក
ឪឡឹក ត្រូវបានគេដឹងថា មានតួនាទីបំបាត់ស្នាមអុចខ្មៅ ជួយឲ្យស្បែកមុខភ្លឺរលោង និងផ្តល់សំណើមដល់ស្បែក ក៏ដូចជាជួសជុលការខូចខាត នៃស្បែកផងដែរ។ មិនតែប៉ុណ្ណោះ អ្នកអាចសាកល្បងលាយម៉ាសផ្លែឪឡឹក និងទឹកដោះគោជូរ ដោយកិនផ្លែឪឡឹកមួយចំណែក លាយឱ្យសព្វក្នុងចានមួយជាមួយទឹកដោះគោជូរ ២ ស្លាបព្រាបាយ រួចលាបជាម៉ាសលើមុខ និងក ឬ លាបលើកន្លែងដែលមានបញ្ហានៃស្បែករបស់អ្នក រួចលាងទឹកចេញក្រោយរយៈពេល ១៥ នាទី។
![](https://vachanamedia.com/wp-content/uploads/2024/04/d11fdde01c572cedb156b7c766818790.jpg)
៥ ប្រភេទខាងលើនេះ សុទ្ធតែជាគ្រឿងផ្សំធម្មជាតិ ងាយស្រួលរក និងសក្តិសមគ្រប់ប្រភេទស្បែក ព្រោះភាគច្រើននៃរបស់ទាំងនេះមានលក្ខណៈសម្បត្តិត្រជាក់ពីធម្មជាតិ ព្រមទាំងជួយការពារស្បែករបស់អ្នកពីពន្លឺព្រះអាទិត្យ និង ជួយរក្សាសំណើមដល់ស្បែកមុខក្នុងរដូវក្តៅ។