មិនថាម៉ាក់ៗសម្រាលតាមធម្មជាតិក៏ដោយ វះកាត់ក៏ដោយពួកគាត់សុទ្ធតែធ្វើការលះបង់ដូចគ្នា ដូច្នេះគាត់គួរទទួលបានការស្រឡាញ់ មើលថែ និងលើកទឹកចិត្ត ដោយមិនមែនជាការប្រៀបធៀប ការបន្តុះបង្អាប់នោះទេ។ ដោយសារពេលខ្លះនៅមានមនុស្សមួយចំនួននៅគិត និងប្រៀបធៀបនៅចំណុចនេះដែលធ្វើឲ្យបងៗស្រ្តីមួយចំនួនបាក់ទឹកចិត្តជាខ្លាំង បូករួមទាំងគ្មានពេលថែខ្លួនឯង គ្មានអ្នកជួយសម្រាល ទើបរូបរាងកាយ និងផ្លូវចិត្តគាត់មានការប្រែប្រួលជាខ្លាំង។ ខាងក្រោមនេះជាគន្លឹះសំខាន់ៗដើម្បីជួយឲ្យពួកគាត់បានប្រសើរឡើងដែលណែនាំដោយដុកទ័រ ទឹង សុគន្ធមាលា បម្រើការនៅគ្លីនិច Mémoire Polyclinic and Maternity ។
1. ព្យាយាមរក្សាសុខភាពជុំវិញការពពោះឲ្យបានល្អ បូករួមទាំងសុខភាពផ្លូវកាយឲ្យរឹងមាំ ដូច្នេះក្រោយសម្រាលហើយសុខភាពផ្លូវក៏ឆាប់ល្អឡើងវិញដែរ
2. ការកម្រិតការឡើងទម្ងន់ក្នុងកំឡុងពេលពពោះឲ្យស្ថិតនៅកម្រិតស្តង់ដារ ហើយបន្ថែមនូវការហាត់ប្រាណសមស្រប និងសម្រាកឲ្យបានគ្រប់គ្រាន់
៣. មានការលំហែអារម្មណ៍ លំហែខួរក្បាល មានពេលសម្រាកដើម្បីធ្វើអ្វីដែលខ្លួនចូលចិត្ត ដោយមានការជួយពីស្វាមី ឬគ្រួសារក្នុងការមើលកូនបានខ្លះ
4. ចំណុចសំខាន់មួយទៀតគឺព្យាយាមគិតវិជ្ជមាន និងស្វែងរកជំនួយពីស្វាមីឲ្យបានទាន់ពេលនៅពេលដែលខ្លួនមានអាម្មណ៍តានតឹង ព្រោះបើម៉ាក់ៗសំងំលាក់ទុកតែឯនោះសុខភាពផ្លូវចិត្តកាន់តែដុនដាបទៅ។
រឿងទាំងនេះមើលទៅតិចតួចមែនតែវាពិតជាសំខាន់ និងទាមទារឲ្យអ្នកម៉ាក់ និងក្រុមគ្រួសារយកចិត្តទុកដាក់ឲ្យបានល្អបំផុត។
