ជីវិតមិនមែនជួបតែរឿងល្អនោះទេ ហើយក៏មិនអាចសប្បាយចិត្តគ្រប់ពេលនោះដែរ ពេលខ្លះយើងហត់នឿយនឹងរឿងដែលមិនចង់ជួប តែយ៉ាងណាក៏គេចមិនផុតក្នុងជីវិត ដូច្នេះយើងគួរតែចេះឲ្យខ្លួនឯងសម្រាកខ្លះទើបជាការល្អ។ ខាងក្រោមនេះអាចជាវិធីងាយៗខ្លះសម្រាប់អ្នកដែលកំពុងមានសម្ពាធ៖
១. មើលពិភពលោកខាងក្រៅ
គួរតែចំណាយពេលដើរចេញទៅក្រៅ មើលការរស់នៅផ្សេងៗដែលអ្នកមិនធ្លាប់ជួប ធ្វើដំណើរទៅកន្លែងដែលអ្នកមិនទាន់បានទៅ និងរស់នៅជាមួយជីវភាពដែលអ្នកមិនធ្លាប់ស្គាល់ ពេលនោះអ្នកនឹងលែងមានអារម្មណ៍ថាហាត់នឿយជាមួយជីវិតទៀតហើយ។
២. ល្អចំពោះខ្លួនឯង
ដកខ្លួនចេញពីរឿងរ៉ាវដែលមិនល្អ ដើម្បីយកពេលមើលថែខ្លួនឯង ថែរក្សាខ្លួន និង ធ្វើអ្វីដែលអ្នកចង់ធ្វើដើម្បីឲ្យខួរក្បាល និង ចិត្តជ្រះស្រឡះជាមួយរឿងដែលធ្វើឲ្យអ្នកមិនសប្បាយចិត្ត។
៣. ចាប់ផ្ដើមធ្វើអ្វីដែលថ្មី
ចេះច្រៀង ចេះរាំ ចេះហែលទឹកអត់? បើនៅ គួរតែចាប់ផ្ដើមសាកល្បងរៀនពីវា ព្រោះពេលនោះអ្នកនឹងមានអារម្មណ៍ថាជីវិតអ្នកកំពុងដើរទៅមុខសាជាថ្មីមិនខាន។
៤. ប្រើពេលចុងសប្ដាហ៍របស់អ្នកឲ្យមានតម្លៃ
ប្រហែលពេញមួយសប្ដាហ៍នេះអ្នកចំណាយថាមពល ចំណាយខួរក្បាលច្រើនពេកហើយ ដូច្នេះគួរតែសម្រាកហើយ មិនគួរយកពេលទៅគិតរឿងការងារ រឿងអត់ប្រយោជន៍ទៀតនោះទេ គួរតែចំណាយពេលនេះ ទៅលំហែកាយ ដើរផ្សារ មើលកុន ហែលទឹក ច្រៀង រាំ ដើម្បីយកកម្លាំងបន្តនៅក្នុងថ្ងៃបន្ទាប់ទៀត។
៥. ដើរចេញពីកន្លែង និង មនុស្សដែលអ្នកមិនចង់ជួប
គេចបានគួរតែគេច ព្រោះពេលដែលជួបមនុស្សដែលអ្នកមិនចង់ជួបវាគ្មានបានអីមកវិញក្រៅពីការមិនសប្បាយចិត្តនោះទេ ហើយបើកន្លែងនោះជាកន្លែងដែលអ្នកមិនចង់នៅ គួរតែចាកចេញបើអាច កុំទ្រាំរហូតដល់អ្នកស្អប់ពិភពលោកនេះទាំងមូល។
ជីវិតតែងជួបបញ្ហា ភាពហត់នឿយ តែវាក៏មិនរហូតដែរ ដូច្នេះត្រូវចេះដោះស្រាយវា ហើយសម្រាកលំហែចិត្តដើម្បីបន្តទៅថ្ងៃថ្មីទៀត៕
