ការលើកទឹកចិត្តគឺជាកម្លាំងចលករដ៏សំខាន់នៅក្នុងជីវិតរបស់មនុស្សម្នាក់ៗ ដែលជាហេតុផលធ្វើឲ្យពួកគេអាចទទួលបានជោគជ័យនៅក្នុងជីវិតទោះបីជាដួលច្រើនដងក៏ដោយ។ នៅក្នុងអត្ថបទនេះនឹងបង្ហាញពីហេតុផលទាំង ៤ ដែលការលើកទឹកចិត្តមានថាមពលខ្លាំងសម្រាប់ជីវិតរបស់អ្នក ៖
១. នាំអ្នកឲ្យមានការតស៊ូកាន់តែប្រសើរ
គ្មានការព្យាយាមណាដែលមិនទទួលបានលទ្ធផលនោះទេ ឲ្យតែអ្នកចេះលើកទឹកចិត្តខ្លួនឯងឲ្យហ៊ានប្រឈមមុខនឹងឧបសគ្គដោយមិនបោះបង់ចោល ទោះជាបរាជ័យក៏ដោយ។ លើសពីនេះ ត្រូវចាំថាកុំបាក់ទឹកចិត្តដោយសារតែការបរាជ័យតិចតួច ត្រូវលើកទឹកចិត្តខ្លួនឯងឲ្យប្រឹងដើរទៅមុខទោះជាគ្មាននរណាម្នាក់នៅក្បែរអ្នកក៏ដោយ។
២. ជួយឲ្យអ្នកគិតពីភាពវិជ្ជមានជាងមុន
នៅពេលដែលអ្នកទទួលបានការលើកទឹកច្រើន ការគិតរបស់អ្នកកាន់តែវិជ្ជមាន។ ម្យ៉ាងទៀត ពេលអ្នកមានកម្លាំងចិត្តគ្រប់គ្រាន់ អ្នកមិនចាំបាច់ឲ្យអ្នកណាមកបង្ខំអ្នកធ្វើអ្វីមួយឡើយ ប៉ុន្តែអ្នកនឹងព្យាយាមធ្វើរឿងទាំងនោះ ដោយខ្លួន និង ចង់បានលទ្ធផលល្អជាងមុនតាមដែលអ្នកអាចធ្វើបាន ដូចនេះ ការលើកទឹកចិត្តគឺ សំខាន់ណាស់សម្រាប់ផ្លូវចិត្តរបស់អ្នក។
៣. ជួយឲ្យអ្នកចេះស្រឡាញ់ខ្លួនឯង
ការស្រឡាញ់ខ្លួនឯងជាការលើកទឹកចិត្តមួយដ៏ល្អសម្រាប់អ្នក ព្រោះជួយឲ្យអ្នកអាចមើលថែខ្លួនឯងឲ្យកាន់តែប្រសើរឡើងពីមួយថ្ងៃទៅមួយថ្ងៃ។ លើសពីនេះ នៅពេលដែលអ្នកមានការលើកទឹកចិត្តសម្រាប់ខ្លួនឯង អ្នកនឹងមិនបណ្តោយឲ្យខ្លួនធ្លាក់ចូលក្នុងជីវិតដែលស្មុគស្មាញ និង អស់សង្ឃឹមនោះទេ។
៤. ជួយឲ្យអ្នកឆ្ពោះទៅដល់គោលដៅ
ការលើកទឹកចិត្តពិតជាសំខាន់ណាស់ ព្រោះជាស្ពានជួយឲ្យអ្នកឈានទៅរកភាពជោគជ័យនៅក្នុងជីវិតអ្នក។ សំខាន់ជាងនេះ បើសិនផ្លូវក្នុងគោលដៅនៃភាពជោគជ័័យរបស់អ្នក គ្មានការលើកទឹកចិត្តនោះទេ អ្នកប្រាកដជាឆាប់ចុះចាញ់ និង បាក់ទឹកចិត្ត ដូចនេះការលើកទឹកចិត្តខ្លួនឯងគឺមានឥទ្ធិពលខ្លាំងណាស់សម្រាប់ភាពជោគជ័យរបស់អ្នក។
ការលើកទឹកចិត្ត គឺជាដំណើរការផ្តួចផ្តើមនៃជំហានដំបូង ថែមទាំងជាកម្លាំងជំរុញនៅពីក្រោយអ្វីយើងធ្វើ និង ជាធាតុផ្សំសំខាន់ក្នុងការសម្រេចគោលដៅក្នុងជីវិតរបស់អ្នកដែលមានឥទ្ធិពលបំផុត។
បញ្ចេញមតិយោបល់
