តើអ្នកធ្លាប់ឆ្ងល់ទេថា តើអ្នកបានរាប់អានជាមួយមិត្តភ័ក្ដិពិតប្រាកដ ឬមិត្តក្លែងក្លាយដែលគ្រាន់តែពាក់មុខ ធ្វើជាមិត្តរបស់អ្នក?
ឈប់ឆ្ងល់ទៅ! យើងនឹងបង្ហាញរឿង ៧ យ៉ាង ដែលមិត្តក្លែងក្លាយនឹងធ្វើ ដោយជួយអ្នករកឃើញសញ្ញានៃភាពមិនស្មោះត្រង់។
១. ពួកគេធ្វើជាស្តាប់អ្នក តែនឹងនិយាយអាក្រក់ពីអ្នក ប្រាប់អ្នកដទៃ
រឿងមួយដែលមិត្តក្លែងក្លាយនឹងធ្វើ គឺស្តាប់អ្នកយ៉ាងយកចិត្តទុកដាក់ នៅពេលអ្នកកំពុងចែករំលែកពីជីវិតរបស់អ្នក។ ទោះជាយ៉ាងណាក៏ដោយ នៅពេលដែលអ្នកពិតជាត្រូវការ ការគាំទ្រពីពួកគេ ក្នុងអំឡុងពេលដ៏លំបាក នោះពួកគេស្រាប់តែយកលេស ឬប្រាប់រឿងរបស់អ្នកទៅអ្នកដទៃ។ តែមិត្តពិតនឹងស្តាប់ ហើយគាំទ្រអ្នកគ្រប់កាលៈទេសៈ ។
២. ពួកគេនឹងសម្តែង ជាពិសេសគឺតួកំសត់ តែដើម្បីបង្កើតបញ្ហា
ធ្លាប់កត់សម្គាល់ពីរបៀបដែលមិត្តក្លែងក្លាយ ចេះតែនិយាយដើមគេ និងសម្តែងដែរទេ? ពួកគេតែងសប្បាយចិត្តក្នុងការផ្សព្វផ្សាយពាក្យចចាមអារ៉ាមអំពីអ្នកដទៃ រួមទាំងមិត្តភក្តិទៅវិញទៅមក នៅពីក្រោយខ្នងរបស់ពួកគេ។ ជាពិសេស មិត្តក្លែងក្លាយច្រើនតែងរីករាយ ក្នុងការបង្កភាពចលាចល និងសម្តែង ព្រមទាំងជាញឹកញ៉ាប់គឺបង្កើតបញ្ហា។ ផ្ទុយទៅវិញ មិត្តភាពពិតប្រាកដគឺត្រូវមានទំនុកចិត្ត និងការគោរព មិនមែននៅលើខ្នងនៃការនិយាយអាក្រក់នោះទេ។
៣. ពួកគេរក្សាមុខមាត់នៅចំពោះមុខអ្នក តែរំពឹងចង់បានការតបស្នង
ប្រយ័ត្នចំពោះមិត្ត ដែលរក្សាមុខមាត់ល្អខ្លាំងពេកនៅចំពោះមុខអ្នក ទែអ្វីដែលពួកគេរំពឹងទុក គឺជាថ្នូរត្រឡប់មកវិញ។ ចំណែកមិត្តពិតប្រាកដ គ្មានភាពអាត្មានិយម និងផ្តល់តម្លៃឲ្យអ្នកពិត លើសពីនេះ ពួកគេនឹងផ្តល់ការគាំទ្រ សេចក្តីសប្បុរសរបស់ពួកគេ ដោយគ្មានការរំពឹងថា នឹងទទួលបានអ្វីមួយជាការតបស្នង។
៤. ពេលអ្នកជោគជ័យ ភាគច្រើនពួកគេមិនចេញមុខទេ ព្រោះតែភាពច្រណែន
តើអ្នកបានកត់សម្គាល់ ពីរបៀបដែលមិត្តក្លែងក្លាយរបស់អ្នក ក្លាយជាមនុស្សច្រណែន ឬអាក់អន់ចិត្តនៅពេលអ្នកសម្រេចបានអ្វីមួយ ដែលគួរឱ្យកត់សម្គាល់ដែរទេ? ជំនួសឱ្យការអបអរសាទរភាពជោគជ័យរបស់អ្នក ពួកគេមានទំនោរនឹងបន្ទាបសមិទ្ធិផលរបស់អ្នក ហើយក៏ឃ្លាតឆ្ងាយពីអ្នក។ តែមិត្តពិតនឹងលើកទឹកចិត្តអ្នក ដោយផ្តល់នូវការគាំទ្រ និងការលើកទឹកចិត្តយ៉ាងពិតប្រាកដ ដោយគ្មានការច្រណែន។
៥. ពួកគេមិនដែលនៅក្បែអ្នក ក្នុងពេលដែលអ្នកត្រូវការពួកគេនោះទេ
នៅពេលដែលពេលវេលាដ៏លំបាក មិត្តក្លែងក្លាយនឹងងាយស្រួលរកលេស ដើម្បីជៀសគេចមិនចង់នៅជិតអ្នក។ ពួកគេអាចនឹងអះអាងថារវល់ ឬមិនអាចទាក់ទងបានភ្លាមៗ នៅពេលដែលអ្នកត្រូវការដៃជំនួយ ឬស្មាដើម្បីពឹងពាក់។ ផ្ទុយស្រឡះ មិត្ដភក្ដិពិតប្រាកដបង្ហាញការយល់ចិត្ត និងការយោគយល់ ដោយខ្នះខ្នែងផ្តល់ជំនួយ ឬស្មាសម្រាប់ពឹងពាក់។
៦. ពួកគេនឹងប្រើអ្នក ដើម្បីផលប្រយោជន៍ផ្ទាល់ខ្លួនរបស់ពួកគេ
មិត្តក្លែងក្លាយនឹងផ្តល់អារម្មណ៍កក់ក្ដៅចំពោះអ្នក នៅពេលដែលពួកគេត្រូវការអ្វីមួយពីអ្នក មិនថាវាជាជំនួយផ្នែកហិរញ្ញវត្ថុ ជំនួយការសិក្សា ឬទំនាក់ទំនងជាមួយមនុស្សផ្សេងទៀត។ ហើយនៅពេលដែលពួកគេទទួលបានអ្វីដែលពួកគេចង់បាន ពួកគេអាចនឹងបាត់បង់ចំណាប់អារម្មណ៍ភ្លាមៗ ក្នុងការចំណាយពេលវេលាជាមួយអ្នក។ ផ្ទុយទៅវិញ មិត្តភាពពិតប្រាកដត្រូវបានបង្កើតឡើង នៅលើការយកចិត្តទុកដាក់ ចំពោះគ្នាទៅវិញទៅមក មិនមែនលើអាកប្បកិរិយាឆ្លៀតឱកាសនោះទេ។
៧. ពួកគេមិនសុំទោស ក៏មិនមានទំនួលខុសត្រូវដែរ
សញ្ញាមួយក្នុងចំណោមសញ្ញាដ៏ល្អបំផុត នៃមិត្តក្លែងក្លាយ គឺអសមត្ថភាពក្នុងការទទួលស្គាល់កំហុសរបស់ពួកគេ ឬទទួលខុសត្រូវចំពោះទង្វើរបស់ពួកគេ។ ពួកគេអាចនឹងនិយាយអាក្រក់ ក្បត់ការទុកចិត្តរបស់អ្នក ឬធ្វើឱ្យអ្នកខកចិត្ត ប៉ុន្តែមិនដែលសុំទោសដោយស្មោះនោះទេ។ តែមិត្តភក្តិពិត តែងតែដាក់ចិត្តដាក់កាយ ហើយសុំទោសពេលគេធ្វើខុស ព្រមទាំងព្យាយាមកែប្រែខ្លួនផងដែរ។
ដូច្នេះ សូមចាំថា វាគ្មានប្រយោជន៍ទេ ដែលអ្នកមានមិត្តភ័ក្តិច្រើន ព្រោះមានមិត្តច្រើនបានប្រយោជន៍អ្វីបើភាគច្រើន សុទ្ធតែជាមិត្តក្លែងក្លាយនោះ គួរតែមានមិត្តដែលស្រឡាញ់រាប់អានអ្នក យ៉ាងពិតប្រាកដ ទើបជាការប្រសើរ។
ប្រភព៖ themindsjournal
