ក្នុងទំនាក់ទំនងស្នេហារបស់មនុស្ស ២ នាក់តែងតែចង់ឲ្យមានភាពរីករាយ សុភមង្គល តែពេលខ្លះទៀតយើងក៏ជួបមនុស្សមិនសមតាមប្រាថ្នាជាពិសេសគឺមនុស្សប្រុសអាត្មានិយមតែម្ដង។ បើសិនជាអ្នកមើលឃើញថាគាត់មានចំណុចទាំង៥ខាងក្រោមនេះហើយ មានន័យថាមនុស្សប្រុសម្នាក់នោះជាមនុស្សប្រុសដែលអាត្មានិយមក្នុងទំនាក់ទំនងស្នេហាហើយ។
១. តែងតែឲ្យអ្នកសម្របតាមគាត់
គាត់ចង់ឲ្យអ្នកធ្វើតាមគាត់ សម្របខ្លួនតាមគាត់ទាំងគាត់មិនដែលសម្របតាមអ្នកវិញឡើយ និយាយរួមគឺគាត់គិតតែពីអារម្មណ៍ខ្លួនឯង ធ្វើម៉េចឲ្យតែគាត់មានក្ដីសុខ សប្បាយ មិនទើសទាល់។
២. គាត់តែងតែមានគំនិតអវិជ្ជមានក្នុងស្នេហា
គ្រប់ពេលគឺគាត់តែងតែគិតពីរឿងអាក្រក់ៗ មើលឃើញតែចំនុចមិនល្អទាំងដែលរឿងល្អៗជាច្រើនមិនដែលលើកមកនិយាយ។ លើសពីនេះជាមនុស្សដែលតែងចាប់កំហុស ហើយបន្ទោស ដោយមិនមើលពីខ្លួនឯង និងព្យាយាមកែតម្រូវជាមួយគ្នា។
៣. គាត់គិតថាគាត់ជាមនុស្សសំខាន់តែម្នាក់ក្នុងស្នេហានេះ
គាត់គិតថាគាត់ជាមនុស្សម្នាក់គត់ដែលធ្វើឲ្យស្នេហានេះដំណើរការទៅបានដោយមិនបានគិតពីម្នាក់ទៀតឡើយ។ គាត់គិតថាគាត់បានលះបង់ បានព្យាយាម ហើយធ្វើគ្រប់យ៉ាងដើម្បីស្នេហា ទាំងដែលគាត់មើលឃើញតែពីខ្លួនឯង មិនមើលឃើញការលះបង់ម្ខាងទៀត។
៤. គាត់មិនដែលផ្ដល់ភាពកក់ក្ដៅ
គាត់មិនសូវខ្វល់ខ្វាយពីអ្នកហើយមិនដែលផ្ដល់ភាពកក់ក្ដៅ ផ្ដល់ពេលវេលាឲ្យអ្នក តែបែរជាស្រែកថាអ្នកមិនខ្វល់ពីគាត់ មិនយល់ពីគាត់ទៅវិញ។ ពេលអ្នកនិយាយបែរជាសើរើររឿងរ៉ាវផ្សេងៗមកការពារខ្លួន។
៥. គាត់ទាក់ទងនារីដទៃដើម្បីភាពសប្បាយរបស់គាត់
គាត់នៅតែគិតថាការដើរញ៉ែ ឬទាក់ទងអ្នកផ្សេងជារឿងធម្មតាសម្រាប់មនុស្សប្រុសព្រោះវាធ្វើឲ្យគាត់សប្បាយចិត្តដោយមិនបានខ្វល់ពីចិត្តអ្នកនោះទេ។ គាត់តែងយកលេសថា គាត់លេងសើចនឹងគេ ហើយស្មោះតែអ្នក ទាំងការពិតខ្លួនកំពុងតែខុស។
បើអ្នកកំពុងតែជួបមនុស្សប្រុសបែបនេះ គួរតែពិចារណាឡើងវិញថាគួរតែសម្រេចចិត្តបែបណា។ ពេលខ្លះបើចេះតែទ្រាំ ហើយមិនគិតពីខ្លួនឯង មួយជីវិតនេះអ្នកនឹងមិនអាចរកសុភមង្គលឲ្យខ្លួនឯងឡើយ៕
