ក្នុងទំនាក់ទំនងស្នេហា ទង្វើ និង សកម្មភាព របស់មនុស្សប្រុសពិតជាសំខាន់ណាស់ មិនមែនបានត្រឹមតែសម្តីនិយាយ ពីរបីម៉ាត់ហើយប្រាប់ថាស្រឡាញ់អ្នកនោះទេ ប៉ុន្តែបើមនុស្សប្រុសម្នាក់នោះ ច្បាស់លាស់ជាមួយអ្នក គេតែងតែធ្វើរឿងទាំងនេះពេលនៅជាមួយអ្នក។
១. គាត់ជឿលើអ្នក ជាជាងជឿអ្នកដទៃ
ក្នុងទំនាក់ទំនងស្នេហា មិនថារឿងអ្វីផ្សេង គាត់មិនដែលស្តាប់សម្តីអ្នកដទៃ ឬ ជឿអ្នកផ្សេងជាជាងអ្នកនោះទេ ហើយគាត់តែងតែទុកចិត្តអ្នក និងសួរអ្នកជាមុនសិនបើមានអ្វីសង្ស័យ។
២. គាត់តែងចែករំលែកជាមួយអ្នក សូម្បីតែរឿងតូចតាច
នៅពេលគាត់ស្រឡាញ់អ្នក ទោះជារឿងសប្បាយចិត្ត ឬ កើតទុក្ខ គាត់តែងតែប្រាប់ពីអ្វីដែលកើតឡើងចំពោះគាត់ឲ្យអ្នកបានដឹង ប្រៀបដូចជាអ្នកកំពុងនៅជាមួយគាត់ ព្រោះមនុស្សប្រុសមិនងាយបង្ហាញការលំបាករបសខ្លួនឲ្យអ្នកដទៃដឹងទេ ប៉ុន្តែគាត់ប្រាប់អ្នកមានន័យថាអ្នកសំខាន់សម្រាប់គាត់ហើយ។
៣. គាត់មិនដែលសន្យា ប៉ុន្តែគាត់តែងតែធ្វើឲ្យអ្នកឃើញ
សម្រាប់រឿងមួយចំនួនប្រហែលជាគាត់មិនបានសន្យាជាមួយអ្នកទេ ប៉ុន្តែបែរជាធ្វើសកម្មភាពឲ្យអ្នកឃើញដោយមិនមែនបានត្រឹមតែសម្តី ដូចជាជូនអ្នកដើរផ្សារ ឬ ទៅលំហែរអារម្មណ៍ គាត់តែងតែធ្វើវាភ្លាមៗនៅពេលដែលអ្នកចង់ ដោយមិនដែលឲ្យអ្នកចាំថ្ងៃនេះ ថ្ងៃនោះឡើយ។
៤. គាត់តែងតែលើកទឹកចិត្ត និងឲ្យអ្នកដើរតាមក្តីស្រមៃរបស់ខ្លួនឯង
ក្នុងថ្ងៃដែលអ្នកបាក់ទឹកចិត្ត និង អស់សង្ឃឹមខ្លាំង គាត់នៅក្បែរអ្នកហើយនិយាយលើកទឹកចិត្តអ្នក កុំឲ្យបោះបង់ និង ជួយគាំទ្រអ្នកពីក្រោយដោយមិនដែលអាក់ខានឡើយ។
៥. គាត់តែងតែចាប់អារម្មណ៍នឹងរឿងតូចតាចដែលធ្វើឲ្យអ្នកញញឹម
ទម្លាប់តូចៗដែលអ្នកមានរាល់ថ្ងៃ គាត់តែងតែកត់សម្គាល់ទុក ហើយព្យាយាមធ្វើសម្រាប់អ្នក ដូចជាដឹងពីចំណង់ចំណូលចិត្តរបស់អ្នក ដឹងពីអ្វីដែលអ្នកត្រូវការដោយមិនបាច់និយាយ និង ធ្វើទង្វើតូចៗដើម្បីដូរយកស្នាមញញឹមរបស់អ្នក។
៦. គាត់តែងតែលួងអ្នក បន្ទាប់ពីឈ្លោះគ្នារួច
គ្រប់ពេលដែលមានរឿងឈ្លោះគ្នា គាត់តែងតែធ្វើជាអ្នកចាញ់ ហើយត្រឡប់មកសុំទោសអ្នក មិនមែនដើម្បីតែឲ្យអ្នកបាត់ខឹងនោះទេ ប៉ុន្តែដោយសារតែគាត់ស្រឡាញ់អ្នក និងធ្វើឲ្យអ្នកសប្បាយចិត្តឡើងវិញ។
បើបានជួបមនុស្សប្រុសបែបនេះហើយ ព្យាយាមរក្សាគេផង ព្រោះអ្នកមិនអាចជួបមនុស្សពីរដងក្នុងមួយជីវិតនោះទេ ហើយបើសិនជាអ្នកសង្កេតឃើញថាដៃគូរបស់អ្នក បង្ហាញទង្វើបែបនេះជាមួយអ្នក ប្រហែលអ្នកជាមនុស្សមានសំណាងក្នុងរឿងស្នេហាហើយ។
