ភាពទន់ជ្រាយអ្នកណាម្នាក់ក៏មានដែរ ជាពិសេសសចំពោះមនុស្សស្រីដោយសារតែនាងមានចិត្តច្រើន ឆាប់ប៉ះទង្គិចផ្លូវចិត្តនិងអារម្មណ៍ ប៉ុន្តែចំពោះរឿងទាំងអស់នេះអ្នកមិនអាចឲ្យវាគ្របដណ្តប់ជុំវិញខ្លួនរបស់អ្នកបានទេ ត្រូវរៀនកាត់បន្ថយខ្លះ។ លើសពីនេះអ្នកក៏ត្រូវរៀនចាកចេញពីរឿងណាដែលធ្វើឲ្យអ្នកបាក់ទឹកចិត្ត ដូច្នេះវិធីខាងក្រោម ៥យ៉ាងនេះនឹងអាចជួយអ្នកឲ្យចាកចេញពីភាពទន់ជ្រាយ អស់សង្ឃឹមបាន៖
១. ឈប់ដេញចាប់រឿងស្នេហា
ពិតណាស់មនុស្សស្រីដែលរឹងមាំនាងមិនដែលយកស្នេហាជាធំនោះទេ នាងតែងតែផ្តោតលើការរស់នៅដែលល្អនឹងធ្វើអ្វីដែលនាងសប្បាយចិត្តប៉ុណ្ណោះ ព្រោះនាងគិតថាស្នេហាអាចនឹងមកក្រោយនៅពេលដែលនាងមានសមត្ថភាពគ្រប់គ្រាន់ និងអាចស្រឡាញ់ខ្លួនឯងបានគ្រប់គ្រាន់។ អ្នកត្រូវចាំថាស្នេហាបើកាន់តែដេញចាប់ អ្នកកាន់តែហត់នឿយ។
២. បង្កើតអារម្មណ៍វិជ្ជមានឲ្យខ្លួនឯង និងមនុស្សជុំវិញខ្លួន
ចំណុចនេះអ្នកគួរតែគិតពីអ្វីដែលល្អនៅជុំវិញខ្លួន រឿងខ្លះមិនមែនសុទ្ធតែអាក្រក់រហូតទេ ល្អឬអាក្រក់អាស្រ័យលើចិត្តគំនិតរបស់អ្នកប៉ុណ្ណោះ ។ រៀនគិតពីភាពវិជ្ជមានខ្លះទៅព្រោះអ្នកមិនមែនជួបតែរឿងខកចិត្តរហូតនោះទេ រៀនលើកទឹកចិត្តខ្លួនឯង និងធ្វើឲ្យខ្លួនឯងកាន់តែរឹងមាំពីមួយថ្ងៃទៅមួយថ្ងៃ។ ពេលខ្លះដោយសារអ្នកបិទចិត្តខ្លួនឯងពេក អ្នកក៏មើលមិនឃើញពីភាពស្អាត ខ្លាំងរបស់ខ្លួនឯង និងមនុស្សជុំវិញខ្លួនអ្នកក៏ថាបាន។
៣. រៀនផ្លាស់ប្តូរខ្លួនឯង
ចង់ក្លាយជាមនុស្សរឹងមាំ ត្រូវរៀនផ្លាស់ប្តូរ និង ស្វែងរកខ្លួនឯង។ ទម្លាប់មិនល្អ កាត់បានគួរតែកាត់ចោលទៅ រឿងខ្លះអ្នកអាចនឹងមើលរំលង ចង់ចាកចេញពីភាពទន់ខ្សោយ ត្រូវរៀនមើលពីទិដ្ឋភាពជុំវិញខ្លួននឹងរៀនច្នៃខ្លួនឯងឲ្យមានតម្លៃ មនុស្សស្រីដែលរឹងមាំតែងតែផ្លាស់ប្តូរខ្លួនឯងឲ្យល្អជាមុនសិន ជាជាងឲ្យខ្លួនឯងនៅក្នុងភាពទន់ជ្រាយដែលមិនអាចទៅណាបាន។
៤. ផ្តោតលើគោលដៅជីវិត
គោលដៅជីវិតពិតជាសំខាន់ណាស់ អ្នកមិនអាចបណ្តោយខ្លួនឲ្យរសាត់តាមខ្យល់បានទេ ក៏មិនអាចធ្វើដោយខ្ជីខ្ជាបានដែរ។ ជីវិតអ្នកបើមិនចេះកំណត់ទេ អ្នកមិនអាចជោគជ័យបានទេ ចង់ក្លាយជាមនុស្សស្រីរឹងមាំ ត្រូវចេះមានគោលដៅច្បាស់លាស់ ម៉ត់ចត់ នឹងមានភាពខ្លាំងនៅក្នុងខ្លួន ទើបអ្នកអាចឈានទៅរកភាពជោគជ័យបាន។
៥. បង្កើនទំនាក់ទំនង
ពិតណាស់អ្នកមិនអាចឃុំខ្លួនឯងឲ្យនៅតែក្នុងបន្ទប់ពេកទេ ការដើរលេងជាមួយមិត្តភក្តិ បង្កើនទំនាក់ទំនងជាមួយមនុស្សជុំវិញខ្លួន អាចឲ្យអ្នកមានភាពល្អប្រសើរបានជាងពេលអ្នកនៅម្នាក់ឯង រៀនលំហែអារម្មណ៍ជាមួយពួកគេខ្លះទៅទើបមិនធ្វើឲ្យស្ថិតនៅក្នុងភាពតានតឹង ហើយអាចបង្កើតឱកាសផ្សេងៗទៀតក្នុងជីវិតផងដែរ។
រៀនធ្វើចិត្តឲ្យសប្បាយរីករាយនិងធូរស្រាលទើបធ្វើឲ្យអ្នកចេញផុតពីភាពដែលមិនល្អនិងទន់ខ្សោយ ហើយប្រែក្លាយខ្លួនជាមនុស្សស្រីពូកែម្នាក់។
