តើអ្នកដឹងទេថា មនុស្សម្នាក់ៗគឺមានភាពខុសគ្នា និងមានមន្តស្នេហ៍រៀងៗខ្លួន គ្រាន់តែពេលខ្លះយើងមិនដឹង និងពេលខ្លះទៀតខ្លួនយើងផ្ទាល់ បានធ្វើរឿងខ្លះបណ្តាលឲ្យខ្លួនឯងបាត់បង់វាដោយមិនដឹងខ្លួន អាស្រ័យលើទង្វើររបស់យើងផ្ទាល់។
ដូច្នេះមុនពេលធ្វើអ្វីមួយ អ្នកគួរតែគិតមុខគិតក្រោយឲ្យបានគ្រប់ជ្រុងជ្រោយ ជាងនេះទៅទៀត បើអ្នកចង់ការពារមិនចង់ឲ្យខ្លួនឯងបាត់បងភាពទាក់ទាញនេះ ចូរកុំធ្វើរឿងមួយចំនួនដែលបានរៀបរាប់ខាងក្រោមនេះ ព្រោះរឿងទាំងនេះ អាចធ្វើឲ្យមនុស្សជុំវិញខ្លួនរបស់អ្នក លែងសូវមានអារម្មណ៍ល្អចំពោះអ្នក។
ចង់ដឹងថា តើរឿងទាំងនោះមានអ្វីខ្លះ សូមអានការរៀបរាប់ដូចខាងក្រោម។
១. មុខមិនរីក
នេះជាចំណុចសំខាន់ ទោះជាអ្នកស្រស់ស្អាតយ៉ាងណា និងទាក់ទាញចិត្តមនុស្សច្រើនយ៉ាងណាក៏ដោយ តែបើអ្នកមិនចេះញញឹម ចូលចិត្តធ្វើមុខក្រមូវនោះ ភាពទាក់ទាញរបស់អ្នកនឹងធ្លាក់ចុះ រឺអាចបាត់បង់មន្តស្នេហ៍អស់ក៏មាន ព្រោះសម្រស់តែមួយមុខវាអាចនឹងមិនទាន់គ្រប់គ្រាន់ វាត្រូវតែបូកបញ្ចូលទាំងភាពស្រស់ស្រាយ ពីខាងក្រៅដូចគ្នា។
២. គ្មានការជឿជាក់លើខ្លួនឯង
ប្រសិនបើអ្នកគ្មានភាពជឿជាក់លើខ្លួន គ្មានថាមពល ក៏អាចបាត់បង់ភាពទាក់ទាញបានដែរ ហេតុអ្វី? ព្រោះពេលខ្លះ ថាមពលខាងក្រៅក៏អាចទាក់ទាញក្រសែភ្នែករបស់អ្នកដទៃដូចគ្នា ដូច្នេះត្រូវតែពង្រឹងខ្លួនឯងទាំងសម្រស់ សមត្ថភាព និងភាពជឿជាក់។
៣. ចូលចិត្តនិយាយស្តីពាក្យអសុរស
បើទោះជាអ្នកស្អាត ពូកែ ទាក់ទាញយ៉ាងណាក៏ដោយ តែបើអ្នកជាមនុស្សចូលចិត្តនិយាយស្តីអសុរស ប្រើពាក្យមិនពិរោះស្តាប់ អាចនាំឱ្យអ្នកបាត់បង់មន្តស្នេហ៍ ដោយមិនដឹងខ្លួនដែរ ដោយសារតែគេអាចគិតថា អ្នកជាមនុស្សមិនល្អ គ្មានសុជីវធម៌ជាដើម។
៤. ចូលចិត្តបង្ហោះដ្រាម៉ាលើបណ្តាញសង្គម
ភាគច្រើន នៅពេលដែលមានមនុស្សចាប់អារម្មណ៍អ្នក គេប្រាកដជាចង់ដឹងពីអ្នកឲ្យបានកាន់តែច្រើន តែច្បាស់ណាស់ បើគេចូលក្នុងបណ្តាញសង្គមរបស់អ្នក ឃើញតែភាពអួរអាប់នោះអារម្មណ៍ល្អៗរបស់គេមានចំពោះអ្នក ក៏ប្រហែលជាបាត់បង់ទៅបន្តិចម្តងៗដូចគ្នា។
ដូច្នេះប្រសិនបើអ្នកកំពុងធ្វើរឿងប៉ុន្មានចំណុចខាងលើនេះ បើអាចសូមបញ្ឃប់ទៅ ព្រោះវាមិនត្រឹមតែអាចធ្វើឲ្យអ្នកបាត់បង់ភាពទាក់ទាញនោះទេ វាក៏អាចធ្វើឲ្យតម្លៃរបស់អ្នកអន់ថយទៅតាមនោះដូចគ្នា។
